ગુજરાત વંદન

ગુજરાત સરકારનો હાઈકોર્ટે ઉધડો લીધો: ગુજરાત હાઈકોર્ટે સરકારને કર્યો મોટો સવાલ, કહ્યું- પોલીસની ભરતી બાબતે શાં માટે બેવડી નીતિ રાખો છો ?

26 Jul, 2024

ગુજરાત સરકારનો આજે ગુજરાત હાઈકોર્ટે પોલીસની ભરતી મામલે ઉધડો લીધો હતો. હાઈકોર્ટે સરકારને સવાલ કર્યો હતો કે, પોલીસ ભરતી મુદ્દે સરકાર બેવડી નીતિ કેમ રાખે છે ? 252 પોલીસ અધિકારીની બઢતી અને અન્ય ભરતી બાકી કેમ છે અને સરકાર પોલીસ કર્મીઓની ભરતી ઝડપી નહીં કરે પરંતુ બઢતી તરત કેમ કરે છે તેવો સવાલ પણ કર્યો હતો. ઉલ્લેખનીય છે કે છેલ્લા ઘણા સમયથી ગુજરાત સરકારે પોલીસ કર્મચારીઓની ભરતી કરી નથી. તેના પગલે સ્ટાફની પણ હાલ ભારે અછત છે.

બઢતી અને ભરતી નિયમ કોને બનાવ્યો તેનો ખુલાસો આપવા કોર્ટે સરકારને આદેશ કર્યો હતો. કોર્ટે જણાવ્યું હતું પોલીસ ભરતી પ્રક્રિયાનો મુદ્દો કોર્ટમાં પેન્ડિંગ છે. જ્યારે અનેક લોકો આશા રાખી બેઠા છે. તો બીજી તરફ બઢતીના આદેશ ઝડપી થાય તેવી બેવડી નીતિ હોવાનું કોર્ટે અવલોકન કર્યું હતું

અરજદારના વકીલ હાર્દિક બ્રહ્મભટ્ટ કહ્યું કે, સરકારે કોર્ટમાં કહ્યું હતું કે, અમે પોલીસ અધિકારીઓને બઢતી આપવા માંગીએ છીએ પરંતુ અમે GPSCની મંજૂરી માંગી છે અને જે પ્રક્રિયા ચાલી રહી છે. જ્યારે કોર્ટે કહ્યું કે, તમારી પાસે પોતાનો ભરતી બોર્ડ છે તો પછી તમે GPSC પર કેમ આધાર રાખો છો, બઢતી અને ભરતી માટે એક જ બોર્ડ હોવું જોઈએ તેવું પણ કોર્ટ ટાંક્યું હતું તેવી વિગતો હાર્દિક બ્રહ્મભટ્ટે આપી હતી